International Journal of Epidemiology 2003;32:344-345
© International Epidemiological Association 2003
Diversion |
Reggae fi Dada
galang dada
galang gwaan yaw sah
yu nevah ad noh life fi live
jus di wan life fi give
yu did yu time pan ert
yu nevah get yu jus dizert
galang goh smile inna di sun
galang goh satta inna di palace af peace
o di waatah
it soh deep
di waatah
it so daak
an it full a hawbah shaak
di lan is like a rack
slowly shattahrin to san
sinkin in a sea af calimity
where fear breed shadows
dat lurks in di daak
where people fraid fi waak
fraid fi tink fraid fi taak
where di present is haunted by di paas
a deh soh mi bawn
get fi know about staam
learn fi cling to di dawn
an wen mi hear me daddy sick
mi quickly pack mi grip an tek a trip
mi nevah have noh time
wen mi reach
fi si noh sunny beach
wen mi reach
jus people a live in shack
people livin back-to-back
mongst cackroach an rat
mongst dirt an dizeez
subjek to terrorist attack
political intrigue
kanstant grief
an noh sign af relief
o di grass
turn brown
soh many trees
cut doun
an di lan is owevahgrown
fram country to toun
is jus tissel and tawn
inna di woun a di poor
is a miracle how dem endure
di pain nite an day
di stench af decay
di glarin sights
di guarded affluence
di arrogant vices
cowl eyes af kantemp
di mackin symbals af independence
a deh soh mi bawn
get fi know bout staam
learn fi cling to di dawn
an wen di news reach mi
seh mi wan daddy ded
mi ketch a plane quick
an wen mi reach mi sunny isle
it woz di same ole style
di money well dry
di bullits dem a fly
plenty innocent a die
many rivahs run dry
ganja planes flyin high
di poor man him a try
yu tink a likkle try him try
holdin awn bye an bye
wen a dallah cyaan buy
a likkle dinnah fi a fly
galang dada
galang gwaan yaw sah
yu nevah ad noh life fi live
jus di wan life fi give
yu did yu time pan ert
yu nevah get yu jus dizert
galang goh smile inna di sun
galang goh satta in di palace af peace
mi know yu coudn tek it dada
di anguish an di pain
di suffarin di prablems di strain
di strugglin in vain
fi mek two enz meet
soh dat dem pickney couda get
a likkle something fi eat
fi put cloaz pan dem back
fi put shoes pan dem feet
wen a dallah cyaan buy
a likkle dinnah fi a fly
mi know yu try dada
yu fite a good fite
but di dice dem did loaded
an di card pack fix
yet still yu reach fifty-six
before yu lose yu leg wicket
‘a noh yu bawn grung here’
soh wi bury yu a Stranger’s Burying Groun1
near to mhum an cousin Daris
nat far fram di quarry
doun a August Town2
Acknowledgments
© Linton Kwesi Johnson, reproduced by kind permission of LKJ Music Publishers Ltd
Notes
Published in Penguin Classics. Mi Revalueshanary Fren: Selected Poems. Linton Kwesi Johnson.
2 District in St Andrews, Jamaica 
CiteULike 
Connotea 
Del.icio.us What's this?
| ||||||||||||||||||||||||||||||||||||||||||||||||||||||||